Acara Pesta Gotilon

ACARA PESTA GOTILON HKBP CINTA DAMAI

RESSORT CINTA DAMAI

Minggu 10 November 2013

01.    PANGGILAN BERIBADAH:

L    : Huria ni Debata na dihaholongan ni Tuhanta Yesus Kristus, dibagasan sadarion tung tama do hita mandok mauliate tu Debata, disaluhut pandonganion dohot pangaramotion ni Debata  di sude pardalan ni ngolunta. Di ari sadarion dipaloas Debata huria-Na, patupahon PESTA GOTILON, manghalashon pasu-pasu dohot denggan basa ni Jahowa dibagasan ngolunta. Saluhutna i tung asi ni roha ni Debata do i tu hita. Ala ni tapuji ma Tuhanta jala tasomba ma Ibana, taendehon ma “Sangap ni Jahowa”

J    : (mangendehon BE 581: “Sangap ni Jahowa”)

         Sangap ni Jahowa na sun timbul i, balga ni holongNa ndang tarasam i

          Dilehon AnakNa na sasada i, manobus hita jolma pardosa i

          Pujima Debata ale manisia, las roham, las roham somba ma Debata

          Dapothon Jahowa na sun timbul i, marhite AnakNa Tuhan Jesus i

 L   :  Tung so tarasam hita do balga ni holong ni roha ni Debata, dibagasan pardalan ni ngolunta, jala tung so hasuhatan do denggan ni basaNa. Antong haholongi ma Debata sian nasa roham, sian nasa ateatem dohot sian nasa pingkiranmu. Robe ma hamu tu adopanNa jala somba ma Ibana.

J    : (mangendehon BE 581: “Sangap ni Jahowa”)

          Tung so hasuhatan do basaNa i, marhite AnakNa ni lehonNa i

          MudarNa durus do di hau silang i, rara pe dosanta ias di baen i

          Pujima Debata ale manisia, las roham, las roham somba ma Debata

          Dapothon Jahowa na sun timbul i, marhite AnakNa Tuhan Jesus i

L    :   Dungi bahenonku ma nasida dohot angka na humaliang dolokdolokKu gabe pasupasu, jala ahu parohon udan di tingki halehettanna, gabe angka udan parpasupasuan do i. Jala lehonon ni hau di ladang do parbuena, jala lehonon ni tano i do gogona, jala marsonangsonang nasida di tanonasida i, ninna Tuhan Jahowa.

 J    : Mauliate ma rohanami tu Ho, ala diparmudu, diramoti jala dipasupasu Ho sude na tinompaMi marhite asi dohot holong ni rohaM. Sai suanhon jala patorang ma tu hami pasupasuMi marhite Tondi Porbadia i. Asa lam tau hami manjalo sude asi ni rohaM na godang i.

                                                   … jongjong …

J    : (mangendehon BE 581: “Sangap ni Jahowa”)

         Balga situtu pambaenMi Debata, tung so hasuhatan holong ni rohaM

           Tu jolma pardosa asi do rohaM, di ungkap, Ho dalan lao tu banuaM

          Pujima Debata ale manisia, las roham, las roham somba ma Debata

          Dapothon Jahowa na sun timbul i, marhite AnakNa Tuhan Jesus i

 02.    VOTUM – INTROITUS

L : Marhitehite goar ni Debata Ama dohot goar ni AnakNa Tuhan Yesus Kristus dohot Goar ni Tondi Parbadia na manompa langit dohot Tano on.

J   : Amen.

L : Olophon ma Jahowa, ale sandok tano on! Oloi hamu ma Jahowa marhitehite las ni roha, ro be ma hamu tu joloNa marhitehite olop-olop.

J   : Boto hamu ma on: Jahowa do Debata; Ibana jumadihon hita, jala Ibana nampuna hita, bahen bangsona dohot biru-biru pinarmahanNa.

L  : Bongoti hamu ma angka bahalNa marhitehite hamauliateon, angka alamanNa marhitehite pujipujian, mauliate ma roha muna tu Ibana, puji ma goarNa. Haleluya.

J      : (mangendehon:)

        Haleluya Haleluya Haleluya Puji Tuhan 2x

        Puji Tuhan Haleluya, Puji Tuhan Haleluya

        Puji Tuhan Haleluya, Puji Tuhan.

L : Martangiang ma hita: Ale Debata Amanami, mandok mauliate do hami tu Ho, di sude denggan ni basaM. Tung so tarasam do angka pambahenanMu, na mandongani dohot na mamasu-masu sude hami ruasMon. Sadarion dilehon Ho do las ni roha tu huriaM, na boi patupahon PESTA GOTILON. Tu Ho do hami pasahathon parsombaon nami, ala sian tingki tu tingki, lam mangerbang huriaMon dohot panghobasionNa. Dilehon Ho do sada ni roha di sude ruasMu jala didongani Ho do nang angka parhalado laho marhalado i huriaM. Antong sai sai saut ma harajaonMu dohot hamuliaonMu di huriaMon, dibagasan goar ni anakMu Tuhan Jesus Kristus si Palua hami. Amin.

                                                           — hundul —

03.    Marende : “O Tuhan Togu-togu Ma Au”

O Tuhan togu-togu ma au, tu dalan lomo ni rohaMi

Raphon Ho sonang mardalan au, nang rahis maol sidalananki

TondiMi baen manggohi au on, margogoihon au na posoMon

Pasangap Ho dingolungkon, paima sahat tu surgo au on

Ama : Panghulingi ma au o Tuhan, na rade tumangihon hataM

Ina   :  Sai tumpahi ruasMu Tuhan, na uasan nuaeng di hataM

Ama : Sai patau ma au on naposoM

Ina   : Manjou halak na dao sian Ho

Sude: Ro di na so tumanda Ho, muba gabe pangoloi di Ho

 04.     MANJAHA PATIK

L1 : Tangihon hamu ma patik ni Debata na nienet sian Mateus 5 : 16, songon on ma didok: Naeng songon i ma marsinondang palitomuna di jolo ni halak, asa diida angka pambahenanmuna na denggan i, asa dipuji nasida Amamuna na di banua ginjang i. Ima sahatna. Antong rap mangido gogo ma hita tu adopan ni Debata.

J    :   Ale Tuhan Debata sai pargogo I ma hami, mangulahon na hombar tu patikmi. Amin.

 05.    K o o r :

 06.    Marende BE.No. 182 “Tu Jolom O Debatangku”

          Tu Jolom o Debatangku, sai use do rohangkon

           Sai pasiat tangiangku, dohot iluilungkon

                                          — jongjong  —

           Husolsoli do rohangku nag ok doso i tongtong

           Ai godang ariaringku na hubahen ambolong

 07.    PANOPOTION NI DOSA DOHOT HASESAAN NI DOSA

L :  Huria ni Debata na nihaholongan ni Kristus. Dibagasan unduk dohot serep ni roha, ro ma hita tu adopan ni Debata. Tatopoti ma dosanta tu Amanta Debata, jala tapangido ma hasesaan ni dosanta, dibagasan goar ni Tuhan Jesus Kristus Parasi roha i. Martangiang ma hita dibagasan rohanta be.

                         (… tingki na hohom… musik mangendehon BE. 686)

L  : Ale Debata amanami na badia jala na gok asi ni roha, manang na piga hali hami ro tu adopanMu, huparhatopot hami do sude angka dosanami na godang i. Tung mansai jotjot do hami manirpang sian dalanMu, ndang huulahon hami lomo ni roham. Nuaeng ro hami tu joloM mangido asi ni rohaM: Sai sesa ma sude dosa nami jala unang paingotingot sude dosa nami na godang i. Unang ma pabalia hami sian adopanMu ale Jahowa, ala ni dosa dohot hajahaton nami. Alai marpamuati ma rohaM di hami. Huparhatopot hami do, jotjot do hami lilu songon biru-biru masitondong dalanna be. Asi ma roham di hami ale Debata, sesa ma sude dosa nami.

J   :    (mangendehon BE.No. 686:1 “Ramun do au”)

        Ramun do au di jolomi, gok dosangki urasi au

       O, Jesus birubiru i, dison do au patau ma au.

 L    : Ale Tuhan Debata, Amanami, Parasiroha na sumurung! Na pungu do hami di joloM martangiang tu Ho. Ndada mangasahon hatigorannami, na mangasahon as ni rohaM na godang i do. Sai asi ma rohaM mida sandok bangsonami, sesa ma dosanami saluhutna. Sai sungguli ma rohanami, asa muba roha dohot pangalahonami, ala ni Tuhan Jesus Kristus Tuhannami, sipangoluhami.

J    :   (mangendehon BE.No. 686: 2” Ramun do au”)

        Na ro do au tu joloMi, gale do au urupi au

       O, Jesus ala mudarMi, dison do au patau ma au.

L : Huria ni Debata naung manopoti dosa, nuaeng tabege ma hata bagabaga ni Debata, taringot tu hasesaan ni dosanta: Songon on do hata ni Tuhan Jahowa: Nunga pola hupasisi angka pangalaosim songon ombun, jala songon ombun manorop angka dosam. Sai mulak ma ho tu Ahu, ai Ahu do sipalua ho. Hasangapon ma di Debata na diginjang.

 J    : Amin.

                                                   … hundul…

 08.    Marende, BE No. 467 “ Asi ni RohaM Hupuji”

 Asi ni rohaM hupu ji ala Ho manobus au.

 Di paias Ho rohangku, ga-be soranganMu Au.

 IngananMu rohanami. TondiMi manggohi i.

 Pangke dohot ngolunami gabe ulaulaMi.

        Sai papulik rohanami gabe pangoloi di Ho.

       Asa marsahala hami lao mangkatindangkon Ho.

       IngananMu rohanami. TondiMi manggohi i.

       Pangke dohot ngolunami gabe ulaulaMi

 09.    Koor:

 10.    MANJAHA EPISTEL: Poda 26 : 17 - 28

L     : Turpuk Epistel di Minggunta sadarion, ima na tarsurat di Poda 26 : 17 - 28, songon on ma didok disi: Manangkup pinggol ni biang do manang ise pamolus, molo pola piripirion ibana mida bada na so ro di ibana.

J      :  Songon halak na lalaen, na mamantomhon tulbu, sumbia dohot hamatean:

Ama   :           Songon i do baoa na mangansi kedanna, gabe didok muse: Nda na margait sambing do ahu!

Ina : Molo soada soban mintop ma api, jala molo soadong pangasung i mansohot ma parsalisian.

L     : Songon arang tu gara ni api, jala songon soban tu api, songon i do baoa parbadabada pasobu parsalisian.

J      : Hatahata ni pangasung i, hira hata pargaiton do i, hape torus do angka bilut ni pusupusu ditondong.

L     : Songon hudon na nilampis dohot taktak ni perak, songon i do bibir angka na marsigorgor mangumma, hape jat do anggo rohana.

J      : Marhitehite bibirna mangela pangiburu i, hape patahitahi sipaotooto do anggo rohana di bagasan.

Ama   :           Molo dipabasar ibana pangkulingna, unang ma porsea ho di ibana, ai pitu lampis do biasbias ni rohana di bagasan.

Ina   : Dihungkupi pe hosom ni rohana marhite sian ansiansi, hape patar do muse hinajahatna di bagasan luhutan.

J      : Manang ise na mangkali godung, laos ibana sandiri madabu tu bagasanna, jala marsibalik do batu tu halak na manggulangsa.

L     : Matua dila sipaotooto mangkosom halak na niropuhanna, jala pamangan na landit mambahen pargasipan. Ido sahatna. Martua ma halak na tumangihon hata ni Debata jala na umpeopsa.

J      : Amin

 11.    Koor:

 12.    Marende BE.No. 757 “Dipardalanan Jesus Dijolongku”

Dipardalanan Jesus dijolongku, Holong ni tanganMi manogu au

Nang di ngoluku Ho do sombaongku, Tung sonang mardalan raphon au.

Huboto do tangkas pangouonMu, Diiringiring Ho do langkangki

Sahat ro di ujung ni pardalanku, Togu ma au jonok tu lambungMi,

— jongjong —

Ama : Patogu ma Tuhan haporseaonku, Asa polin tu Ho manghirim au,

Ina  : Tu surgo I patulus pardalananku, TondiMi maringan ma di au.

Ama : Huboto do tangkas pangouonMu,

Ina : Diiringiring Ho do langkangki

Sude: Sahat ro di ujung ni pardalanku, Togu ma au jonok tu lambungMi,

 13.    MANGHATINDANGKON HAPORSEAON

L1 : Hamu angka dongan ! Rap dohot angka donganta sahaporseaon di sandok portibion, tahatindangkon ma hata haporseaonta I, rap ma hita mandok:

J    : Ahu porsea … dst.

— hundul —

14.    Koor:

15.    TINGTING + TANGIANG PANGONDIANON.

16.    Koor:

17.    Marende BE.No. 476 “Ndada Au Guru di Au”

(— pelean 1a & 1b —)

     Ndada au guru di au be, Jesus do nampuna au.

     Las rohangku dung hubege, Jesus sipangol au.

     Ndang  be au guru di au. Jesus na humophop au, Nampuna au.

     Tung saleleng au mangolu, Jesus do nampuan au.

     Ndang di au, Tuhan Jesus, daging dohot rohangki;

     Saluhutna hupasahat tu Ho, Jesus Tuhanki.

     Ndang  be au guru di au. Jesus na humophop au, Nampuna au.

     Tung saleleng au mangolu, Jesus do nampuan au.

— musik —

     Ulaonku nang artangku pangke ma baen sangapMi,

     Diusehon Ho mudarmu tung tanda do holongMi.

     Ndang  be au guru di au. Jesus na humophop au, Nampuna au.

     Tung saleleng au mangolu, Jesus do nampuan au.

 18.    JAMITA : Rom 12 : 17 - 21

 19.    Marende, BE. N0. 218 “Tong do Tau Haposan”

(— pelean II — )

Tong do tau haposan Tuhan Jesus I, Ala naung diporsan Do dosanta i

Hata nang dameNa Hangoluan ni, Angka na porsea Di hataNa i.

Hata nang dameNa Hangoluan I, Angka na porsea Di hataNa i

— musik —

Sai tong didongani Na porsea i, Jala ganup ari Ro basaNa i

Tu na so marganggu Di gogoNa i, Na mandok Tuhanku  Na sun denggan i

Tu na so marganggu Di gogoNa i Na mandok Tuhanku  Na sun denggan i

— musik —

Guru di Ibana Sude tano on,  Sintong do hataNa Na tu hita on

Asi ni rohaNa Na sumurung i Dipatongontongon Tu lomoNa i.

Asi ni rohaNa Na sumurung i Dipatongontongon Tu lomoNa i.

 20.    ACARA PESTA GOTILON:

Pdt   : Hamu ruas ni huria na nihaholongan ni Tuhanta Jesus Kristus! Nuaeng sahat ma hita tu acara PESTA GOTILON ni hurianta, laho manghalashon dohot manghamauliatehon denggan basa ni Jahowa. Antong dibagasan roha na mandok mauliate tu Debata, tapuji ma Ibana, taendehon ma BE No. 373 “Mangula Hita Jolma”

J      :  (mangendehon BE, No. 373: “Mangula Hita Jolma”)

           Mangula hita jolma Manabur boni i, Alai anggo jadina Di Debata do i

           Dilehon las ni ari, Nang nambur udan pe

           Tongtong di panumpakNa Marguru sasude

           Nasa ulibasa ro sian Debata, I pe Ibana puji ma Huhut haposi da.

(— ro ma tu jolo sude Parhalado —)

           Sai sian Debatanta do nasa na adong,

           Nang rihit sangkamata, Nang laut,nang tano on.

           Tinompa ni hataNa,  Do hau nang bulung I,

           Nang nasa parbuena, Nang bungabunga i

           Nasa ulibasa ro sian Debata, I pe Ibana puji ma Huhut haposi da.

Pdt   : Hamu dongan sahuria! Nunga i tajalo denggan basa dohot asi ni roha sian Jahowa. Ta okuhon do, saluhutna silehonlehon na denggan, nasa ulibasa na mauliutus, ima na ro sian ginjang. Dilehon do di hita parbueni tano, parbueni suansuanan dohot parbueni angka ulaonta. Saluhutna i nunga tajalo sian Jahowa. Antong nda tama ma hita mandok maulite tu Debata?

J      : Mauliate ma di Ho Tuhan, naung mangalehon parbue ni angka ulaonnami.

Pdt   : Didok hata ni Debata: Ingkon buatonmu ma sian patumonaan ni sandok parbue ni tano i, na dapot ho sian tanomi, naung nilehon ni Jahowa, Debatam tu ho, jala pamasuhonmu do i tu bagasan ampang, jala boanonmu do i tu inganan sipilliton ni Jahowa, Debatam bahen inganan di Goarna. Ingkon burju do lehononmu parpuluan sian nasa gogo ni tano, boni sinaburhonmi, sian saluhut na tubu di tanomi ganup taon. (5 Musa 26:2)

J      : Mauliate ma di Ho Tuhan, naung mangalehon parbue ni angka ulaonnami. Hupasahat hami ma i bahen pelean na hushus di joloM.

Pdt   : Antong! Taruhon hamu ma sintong parsampuluan i tu bagas parpeopan, asa adong bohal di bagasan jabungku, jala unjuni hamu ahu taringot tusi, ninna Jahowa Zebaot, manang so ungkaponku di hamu angka pandiloan ni langit, jala mangusehon tu hamu gabe maradu marlobilobi. (Maleakhi  3:10)

 PASAHATHON SILUA: Ro ma sude ruas pasahathon silua

                                          (Amplop Pesta Gotilon)

 1. Marende BE. 848: “Dison Adong Huboan Tuhan”

     Dison adong huboan Tuhan, parbue ni ngolungku na so tardok nian

     Sadia ma argana Tuhan, Molo sai ni rajuman sude denggan basaM

     Jalo ma Tuhan, Sai las ma rohaM

             …musik  …    

2. Marende BE.No. 585 “Somba ma Jahowa”

     Somba ma Jahowa Debatanta Amen Haleluya

     Sigomgom langit tano on ro diisi na Amen Haleluya

     Beta hita lao, marsinggang tu joloNa

     Amen Haleluya na songkal jala na badia do Jahowa

     Amen Haleluya endehon Amen haleluya endehon

     Amen haleluya endehon Amen haleluya endehon

     Amen haleluya

— musik —

     Puji ma Jahowa Debatanta, Amen Haleluya

     Parasi roha na sumurung do Ibana, Amen Haleluya

     Taendehon ma goar ni Debatanta, Amen Haleluya

     Alani denggan ni basaNa tu hita, Amen Haleluya.

     Endehon; “Amen Haleluya, endehon Amen Haleluya

     Endehon Amen Haleluya, endehon Amen Haleluya”.

— musik –

     Sangap di Jahowa Debatanta, Amen Haleluya

     Na bonar jala marmulia do Jahowa, Amen Haleluya

     Tapatimbul ma goar ni Debatanta, Amen Haleluya

     Na tigor jala na sun gogo salelengna, Amen Haleluya

     Endehon; “Amen Haleluya, endehon Amen Haleluya

     Endehon Amen Haleluya, endehon Amen Haleluya”.

 Pdt   : Tadok ma mauliate tu Jahowa, ai pardenggan basa do Ibana, ro di saleleng ni leleng na do asi ni rohaNa tu hita. Nunga tapasahat siluanta tu huria-Na, songon parbueni angka na taula. Antong! Tangihon hamu ma hata ni Debata na mandok: Alai marhuaso do Debata, mangusehon saluhut asiasi tu hamu, asa sandok tuk situtu di hamu jala marlobilobi hamu, laho patupahon saluhut ulaon na denggan. Antong taharinggashon ma manghobasi huriaNa dibagasan dame, sada ni roha dohot holong ni roha. Jongjong ma hita

J       : (mangendehon BE No 435: “Morolopolop Tondingki)

            Tu Jesus sahat ngolungki, saleleng ni leleng na i

            Rap dohot au endehon ma, endengku na imbaru da

            Sonang ni tingkiiI, dung jumpang Jesus Tuhanki

            Tondi na mangajari au, tarbaen marlas ni roha au

            Sonang ni tingki i, dung jumpang Jesus Tuhanki

21.    TANGIANG PANUTUP: PELEAN – ALE AMANAMI – PASUPASU